1 April 2013

Kemm indum nisterilizza l-bottle?

Huwa importanti li l-flixkun u l-gażaża ikunu ndaf sabiex nipproteġu lit-tarbija minn infezzjoni fil-musrana (gastro-enterite: dijareja, rimettar, deni u dehydration). Dan jgħodd kemm jekk tuża ħalib tal-omm jew ħalib tal-formula.

L-awtoritajiet tas-saħħa f'pajjiżi oħra jagħtu pariri differenti fuq hekk. L-Amerikani jgħidu li huwa biżżejjed li taħsel il-flixkun u l-gażaża sew bl-ilma sħun u sapun; filwaqt li l-Ingliżi jagħtu parir li jkunu sterilizzati sa sena u l-Awstraljani sa' madwar 6 xhur. L-importanti li jkunu dejjem indaf!

F'Malta ħafna ġenituri jisterilzzaw il-flixkun u l-gazaza sakemm it-tarbija jkollha madwar sitt xhur. L-aktar metodi konvenjenti huma sterilizer li jaħdem bil-fwar jew bil-microwave.

Meta ma tibqax tisterilizza aktar, xorta waħda jkun importanti li taħsel il-flixkun (bi brush), il-gazaza u dak kollu li tuża biex titma' lit-tarbija (kuċċarini, bowls, eċċ) bl-ilma sħun u sapun tal-platti. Ixxotta b'sarvetta nadifa.

Żomm f'moħħok ukoll dawn il-punti dwar l-iġjene:
  • Aħsel idejk qabel tipprepara l-ħalib u l-ikel, u meta titma' lit-tarbija.
  • Armi l-ħalib żejjed li jibqa' meta tisqi t-tarbija.
  • Jekk tipprepara l-ħalib minn qabel u żżommu fil-friġġ (sa 24 siegħa), dejjem sterilizza l-bottle anke wara 6 xhur.
  • L-ilma li tipprepara l-ħalib bih irid ikun mgħolli.