Kif ngħinu lit-tfal jieqfu jigdmu?


It-tfal żgħar kultant jigdmu lil xulxin fin-nursery, u anke lill-adulti meta jkunu d-dar. Din il-fażi normalment tgħaddi sal-età ta’ 3 jew 4 snin, hekk kif it-tfal jitgħallmu jikkomunikaw aħjar u jikkontrollaw aktar l-emozzjonijiet tagħhom.

L-istess nistgħu ngħidu għal imġiba goffa, bħal meta jagħtu bl-idejn fil-wiċċ.

Għaliex it-tfal żgħar jigdmu?

It-tfal żgħar jistgħu jigdmu għal diversi raġunijiet:
  • ikunu frustrati, irrabjati jew eċċitati;
  • ikunu għajjenin jew bil-ġuħ;
  • ikunu jridu jiddefendu ġugarell jew jeħduh mingħand tifel ieħor;
  • ikunu qed itellgħu s-snien u jħossu skumdità fil-ħanek;
  • ikunu għadhom ma jafux jesprimu bil-kliem dak li jridu jew dak li qed iħossu.
X’għandek tagħmel meta t-tifel jew it-tifla jigdmu?
  • Irrispondi minnufih. Tgħajjatx u tirrabjax. Ibqa’ kalm, b’wiċċ serju, u leħen baxx.
  • Inżel għal-livell tiegħu, żommu b’idejk it-tnejn, u ħares dritt f’għajnejh.
  • Għidlu b’ton serju, “Aħna ma nigdmux.” Daqshekk — evita spjegazzjonijiet fit-tul.
  • Waqqfu mill-attività li jkun qed jagħmel u ħudu f'post ieħor. B’hekk jitgħallem li l-gdim iġib konsegwenza immedjata.
  • Meta jkun ikkalma, ħallih jerġa’ jingħaqad mat-tfal l-oħra.
Ikkoreġih b’dan il-mod kull darba li jigdem — u mhux daqqa tħalli kollox għaddej u daqqa oħra tgħajjat jew tirrabja miegħu. Il-ġenituri u l-carers għandhom iwieġbu bl-istess mod. B’hekk it-tifel jirċievi messaġġ ċar u konsistenti li l-gdim qatt mhuwa aċċettabbli.

Kif ngħinu lit-tfal jieqfu jigdmu?
  • Osserva x’qed iwassal għall-gdim, u fejn ikun possibbli, intervjeni biex tevitah. Ngħidu aħna, jekk ikunu bil-ġuħ, agħtihom xi snack bnina; jekk żewġt itfal qed jiġġieldu, ifridhom jew għinhom isolvu l-problema.
  • Għallimhom jesprimu ruħhom bil-kliem, pereżempju billi jużaw kliem sempliċi bħal “le”, “tini” u “ieqaf”.
  • Faħħar lit-tfal meta jilagħbu b’mod ġentili, jixxerjaw ma’ xulxin, jużaw il-kliem minflok jimbottaw jew jigdmu, u jirnexxilhom jikkontrollaw ir-rabja tagħhom.
  • Żomm rutina regolari għall-ikel u l-irqad, biex tevita l-ġuħ u l-għeja żejda.
  • It-tfal għandhom ikunu taħt is-superviżjoni ta’ adult waqt il-logħob bejniethom.
Kif tieħu ħsieb lil min ingidem?
  • Agħti attenzjoni immedjata lit-tifel jew lit-tifla li jkunu ngidmu. Ikkonfortah/a.
  • Aħsel sewwa l-gidma bl-ilma u s-sapun. Jekk il-ferita tkun qed tnixxi d-demm, agħfas fuqha b’garża nadifa sakemm jieqaf.
  • Jekk tkun inqasmet il-ġilda, ħu parir mingħand tabib. It-tabib jiddeċiedi jekk ikunx hemm bżonn antibijotiku.
  • Fil-ġranet ta’ wara, oqgħod attent għal sinjali ta’ infezzjoni: tiżdied in-nefħa, il-ħmura jew l-uġigħ. Jekk jiġri hekk, erġa’ kellem lit-tabib.
Il-ġenituri u l-għalliema għandhom jaħdmu flimkien
  • Jekk il-gidma saret fin-nursery, il-carers għandhom jinformaw lill-ġenituri taż-żewġt itfal involuti.
  • Huwa importanti li l-ġenituri jitkellmu mal-għalliema bil-kalma u b’attitudni ta’ koperazzjoni. Ir-rabja u l-argumenti ma jsolvux il-problema.
  • Normalment, b’rieda tajba u b’ħidma konsistenti flimkien, il-problema tissolva.
Meta jkun hemm bżonn aktar għajnuna?

Fil-biċċa l-kbira tat-tfal, il-gdim jonqos u jieqaf hekk kif jikbru u jitgħallmu jesprimu ruħhom aħjar. Madankollu, jekk it-tifel jibqa’ jigdem ta’ spiss, speċjalment jekk ikollu diffikultajiet oħra fl-imġiba, fil-komunikazzjoni jew fl-iżvilupp tiegħu, ikun tajjeb li l-ġenituri jitolbu parir professjonali.