Kif nistgħu nipproteġu lit-tarbija mill-infezzjonijiet?

Fl-ewwel xhur tal-ħajja, is-sistema immunitarja tat-tarbija għadha qed tiżviluppa. Infezzjonijiet li fl-adulti jikkawżaw biss sintomi ħfief jistgħu jkunu perikolużi għal tarbija żgħira. Għalhekk, tajjeb li nieħdu dawn il-prekawzjonijiet, speċjalment fl-ewwel tliet xhur.

• Illimitaw iż-żjarat. Evitaw li jkollkom ħafna viżitaturi f'daqqa, speċjalment fl-ewwel ġimgħat. Żommu ż-żjarat qosra. Bħala prekawzjoni, aħjar li l-viżitaturi ma jdumux ħafna ħdejn it-tarbija, speċjalment fi kmamar magħluqin. Ir-riskju ta' infezzjoni jiżdied meta jkun hemm ħafna nies, ventilazzjoni ħażina, kuntatt mill-qrib u żjarat fit-tul. Jekk xi ħadd ma jiflaħx, anki b'riħ ħafif, m'għandhux jiġi jara lit-tarbija.
• Evitaw kuntatt fiżiku bla bżonn. Aħjar li l-viżitaturi ma jerfgħux lit-tarbija. In-nanniet jistgħu jerfgħuha għal ftit minuti, jekk ikunu f'saħħithom u jkunu ħaslu idejhom.
• Tbusux lit-tarbija. Il-viżitaturi m'għandhomx ibusu lit-tarbija, lanqas fuq idejha, jew ipoġġu wiċċhom qrib wiċċha. Xi infezzjonijiet, bħall-herpes (cold sores), jistgħu jkunu perikolużi ħafna għal tarbija tat-twelid.
• Ħasil tal-idejn. Kull min imiss jew jerfa' lit-tarbija għandu jaħsel idejh sew bl-ilma u bis-sapun, jew juża sanitizer.
• Il-ġenituri wkoll għandhom joqogħdu attenti. Meta jiġu lura mix-xogħol jew minn postijiet pubbliċi, għandhom jaħslu idejhom sew qabel imissu lit-tarbija. Tajjeb ukoll li jbiddlu ħwejjiġhom, speċjalment jekk ikunu jaħdmu f'ambjent fejn ikollhom kuntatt ma' ħafna nies, ma' persuni morda jew ma' tfal żgħar.
• Żommu t-twieqi miftuħin. L-arja friska u ventilazzjoni tajba jgħinu biex inaqqsu r-riskju tat-tixrid ta' infezzjonijiet respiratorji. Meta jkun possibbli, iltaqgħu barra.
• Evitaw postijiet magħluqin u mimlijin nies, bħal festini u laqgħat kbar, speċjalment fl-ewwel xhur.
• Oqogħdu attenti għat-tfal iż-żgħar. Aħwa li jmorru n-nursery jew l-iskola spiss iġorru infezzjonijiet. Għallmuhom jaħslu idejhom qabel imissu lit-tarbija u jevitaw kuntatt mill-qrib meta jkunu ma jifilħux.
• Tpejpux qrib it-tarbija. Tesponux lit-tarbija għad-duħħan tas-sigaretti u għall-vapes. Min ipejjep għandu jpejjep barra, jaħsel idejh, u jibdel il-ħwejjeġ qabel jerfa' lit-tarbija. It-tipjip iżid ir-riskju ta' cot death.
• Agħtu lit-tarbija t-tilqim rakkomandat. It-tarbija għandha tirċievi t-tilqim tagħha skont l-iskeda nazzjonali.
• Il-ħalib tal-omm jipprovdi protezzjoni addizzjonali, peress li fih antibodies li jgħinu jipproteġu lit-tarbija minn diversi infezzjonijiet.

Nota importanti

Jekk tarbija taħt it-tliet xhur ikollha temperatura ta' aktar minn 37.5°C, ħuduha l-isptar b'urġenza. Anki jekk ma jkollhiex deni, tarbija li ma tridx tixrob, tkun għajjiena żżejjed, jew ikollha diffikultà biex tieħu n-nifs, teħtieġ attenzjoni medika immedjata.